Размер шрифта
A- A+
Межбуквенное растояние
Цвет сайта
A A A A
Изоображения
Дополнительно

Архив новостей

30.03.2019

У Беларусі запускаецца дзявочая футбольная ліга для паненак

Беларуская федэрацыя футбола пры тэхнічнай і фінансавай падтрымцы ФІФА ўпершыню на тэрыторыі Беларусі запускае футбольную лігу для паненак, узрост якіх не перавышае 13 год. 

У дэбютным сезоне ў «Футбольнай лізе дзяўчат» згуляе 60 калектываў з усёй Беларусі. Удзел у спаборніцтвах прымуць не толькі каманды ад ДзЮСШ ці іншых спецыялізаваных вучэбна-спартыўных устаноў, але і прадстаўніцы звычайных агульнаадукацыйных школ ці фізкультурна-спартыўных клубаў пры выканкамах. 

Каманды падзелены на восем зон па тэрытарыяльным прынцыпе. Пры падзеле ўлічвалася два фактары: каб у кожнай групе была прыблізна аднолькавая колькасць калектываў і каб усе яны знаходзіліся на зручнай адлегласці адзін ад аднаго. 

Сістэма наступная: каманды ў красавіку-траўні з’язджаюцца ў адно месца і гуляюць між сабой па двухкругавой сістэме. Пераможцы васьмі рэгіянальных зон выходзяць на рэспубліканскі этап і ў пачатку чэрвеня прыязджаюць у Мінск, дзе ў матчах па алімпійскай сістэме вызначаць лепшую каманду краіны. 

Важна падкрэсліць, што ліга будзе нацыянальна-арыентаванай. Кожны дывізіён будзе названы ў гонар выбітнай беларускі — Уршулі Радзівіл, Саламеі і гэтак далей. 

Асобна трэба адзначыць дапамогу ФІФА. Адбыліся адмысловыя трэнерскія курсы для спецыялістаў, якія працуюць з удзельніцамі новай лігі. Цягам пяці дзён эксперты міжнароднай федэрацыі павышалі кваліфікацыю трэнераў. 

Таксама ўсе без выключэння каманды атрымалі па дваццаць мячоў і столькі ж камплектаў гульнёвай формы Adidas: майка, шорты, гетры, буцы і шчыткі. Такому падарунку па-добраму пазайздросцяць шмат якія прафесійныя клубы. 

Ліга атрымае хэштэг #WOOOOW — слоган, які не толькі тлумачыць матывацыю дзеянняў, але і яднае ўсе дывізіёны, адлюстроўвае асноўную эмоцыю ад гульні. 

Акрамя таго, за кожнай тэрытарыяльнай зонай будзе замацаваны спартыўны апякун — футбалістка нацыянальнай зборнай. Прафесійныя спартсменкі будуць падтрымліваць дзяўчынак, запісваць відэазвароты і, галоўнае, нагадваць ім, што самае першаснае ў футболе — атрыманне асалоды. 

Каранямі ідэя зыходзіць у 2017 год, калі ФІФА звярнулася да АБФФ з ініцыятывай аб аказанні дапамогі ў развіцці жаночага футбола ў краіне. Бо ў Беларусі на той час існавалі толькі нацыянальнае і моладзевае першынствы. 

Спаборніцтвы ж для маленькіх футбалістак праводзіліся нерэгулярна і не ў буйной колькасці. Пасля дыскусій спецыялісты прыйшлі да ідэі стварэння рэспубліканскага турніра па футболе сярод дзяўчынак у катэгорыі U-13. 

«Цікавасць да гульні нумар адзін з боку дзяўчат і жанчын з кожным годам узрастае. Задача АБФФ — даць магчымасць гуляць у футбол усім, хто гэтага жадае, не звяртаючы ўвагі на розныя ўмоўнасці, у тым ліку пол. Такія спаборніцтвы павінны даць штуршок для развіцця ўсяго жаночага футбола Беларусі і дазволяць яшчэ большай колькасці дзяўчынак далучыцца да цудоўнай гульні», — упэўнены Віталь Крупіца, начальнік аддзела масавага футбола. 

«Футбольная ліга дзяўчат» атрымае і медыяпаслоў — жанчын з розных галін дзейнасці, якія дабіліся поспехаў у Беларусі. У кожнай з амбасадорак будзе свая зона адказнасці. 

Напрыклад, Таццяна Лавец — адна з лепшых трэнераў па фізпадрыхтоўцы ў краіне, распавядзе дзяўчынкам пра важнасць падрыхтоўкі да гульняў і навучыць правільнай размінцы. 

Бліскучая вядучая Ганна Эйсмант раскажа пра ўзаемадзеянне са СМІ, чаму неабходна з павагай ставіцца да журналістаў і як належыць даваць інтэрв'ю. 

Вядомая беларускамоўная журналістка Адар’я Гуштын зверне ўвагу паненак на велізарнае значэнне беларускай мовы, культуры і гісторыі. 

Вольга Цярэшка, футбольны рэферы, адна з медыяпаслоў турніра: «Цалкам падтрымліваю ідэю стварэння лігі. Гэты турнір дае шанец дзяўчынкам убачыць сябе з боку, убачыць сваіх суперніц, убачыць сэнс футбола. Акрамя саміх спаборніцтваў, гэта зносіны і перадача вопыту не толькі дзяўчынак, але і маладых трэнераў. Можа быць, менавіта з гэтай лігі пачнецца развіццё і папулярызацыя трэнерства ў жаночым футболе. Гэты турнір можа даць глыток свежага паветра жаночаму футболу нашай краіны». 

«Імкнемся падкрэсліць, што беларускі футбол — павага да беларускай гісторыі, культуры, традыцый і досведу. Кожны дывізіён названы ў гонар вядомай беларускі, каб у працэсе футбольных спаборніцтваў мы маглі распавядаць пра гісторыю рэгіёна, краіны, а таксама пра тое, што важна беражліва ставіцца да тых набыткаў і гістарычнага скарбу, якім валодае Беларусь», — адзначае Юры Садоўскі, кіраўнік дэпартамента маркетынгу і камунікацый АБФФ. 

2 красавіка, а 14 гадзіне, на тэрыторыі культурнай прасторы «ОК16» (Мінск, вуліца Кастрычніцкая, 16) адбудзецца прэзентацыя праекта.

Больш фота ў Google-фота "2018-2019. Школьныя фота" (калекцыя фота 01.09.2018-...):

Больш фота ў Google-фота "2017-2018. Школьныя фота" (калекцыя фота 18.03.2018-30.05.2018):

Падобныя тэмы:

Каменцім у Кантакце:

Разделы сайта